نص مسرحية (أخطاء حمراء)

النص المسرحي
أخــــــطاء حمـــــراء
تأليف : مولود داؤد
ملاحظة : الرجاء الاتصال بالمؤلف على الرقم( 00963/33/825416--840050 المتحرك00963/932822665) )في حال كان النص محط إعجاب من قبل أحد المخرجين .............
(( جميع الحقوق محفوظة للمؤلف))
(النص مكتوب باللهجة المحكية السورية )




( في العمق إلى اليمين مواجها الجمهور عمودين بينهما ستارة بيضاء ، على الأرض من اليمين سجادة بيضاء ومن اليسار سجادة حمراء . تعتيم كامل ..تدريجيا نسمع خطوات حذاء يسير على الأرض تبدأ بعيدة ثم تقترب شيئا فشيئا مختلطة بحذاء آخر من جهة أخرى .فجأة يتوقف كل شئ لتبدأ الموسيقى بالتسلل رويدا مع محاولة شخصين إشعال ضوء ما في هذا المكان ، مع اكتمال الموسيقى يأخذ الشخصان ضوءهما يتفجآان بعد رؤية كل منهما للآخر يشهران مسدسيهما ، تعود موسيقى تنذر بالقتل تتصاعد تدريجيا يتحركان تدريجيا بشكل قطري هكذا حتى تتوقف الموسيقى ولا تتم عملية الإطلاق بسبب خطأ في التلقيم ، ينزل الاثنان المسدسين بشكل جانبي تصدر طلقة من الفراغ يسقطان أرضا فيجدان عددا كبيرا من الأحذية الملونة من جهة السجادة الحمراء بيضاء ومن الجهة البيضاء حمراء . يبدآان برمي الأحذية كل واحد باتجاه الآخر وهما يرددان :
الإثنان معا : بحكي ما بحكي بحكي مابحكي بحكي مابحكي .....(حتى انتهاء الأحذية)
الأول : بحكي بدي إحكي
الثاني : ما بحكي ما بدي إحكي
الأول : لأ بدنا نحكي
الثاني :(بعد صمت) إحكي
الأول : (بعد صمت) شطحات أمك ما عاد خليتك تعرف أبوك
الثاني : تعرف أبوك
الأول : وشطحات أبوك هي اللي خلت أمك تشطح
الثاني : أمك تشطح
الأول : كيف طاوعك قلبك ؟
الثاني : كيف طاوعيتك إيديك ؟
الأول : كانت ناطرا تاخدها بحنانك
الثاني : كانت معودة ع الـ بيفوتو وبيطلعو
الأول : يفوتو ويطلعو ..غض نظر
الثاني : عشرين سنة وأنا عم غض نظر ... بيكفي اخراس ..إنت ليش ما غضيت نظر ؟
الأول : ما فيِّ ... كنت عم شوفو بعيوني طالع نازل ...نازل طالع وأنا شوفيني إعمل ؟
ياسيدي وأنا إيدي رايحا جاي ..جاي رايحا ،،هوي طالع نازل وأنا رايحا جاي
طالع رايحا ..نازل جاي .....(يسترخي ...) بتتذكر شو كانت تغنيلك تتنام ؟
الثاني : (يغني ) يالله تنام يالله تنام
الأول : (يصرخ) لاااااااااااا
الثاني : يالله تنام ريما
الأول : لاااااااااااااا
الثاني : ريما ريما الحندقة شعرك أشقر ومنقا
الأول : لاااااااااا
الثاني :(يواجهه بالصراخ) شو كانت تغني ؟
الأول : إنت إلي شيري شيري ......(الأغنية)
الثاني : (بعد صمت ) ليش سمحتلي ؟
الأول : منشان تسمحلي
الثاني : انا لاعبتا وبس
الأول : إنتِ لاعبتا عن قريب وأنا لاعبتو عن بعيد
الثاني : ماكنت متخيل إنو امك عندا هيك ........!!!!
الأول : وأنا ماكنت متخيل انو أبوك جحش لها الدرجة
الثاني : بتقوم بتقتلو
الأول : بقتلو
الثاني : بس هاد أبوك
الأول : وهي أمك (يشهر كل واحد مسدس في وجه الآخر)
الثاني : إنت قتلتو
الأول : وإنت إغتصبتا
الثاني : إنت قاتل
الأول : وإنت مغتصب
الثاني : اللي متلك ما لازم يعيش
الأول : اللي متلك ما لازم يعيش
الثاني : ليش قتلتو؟؟
الأول : قتلتو قبل ما يقتلنا ...إنت ليش اغتصبتا
الثاني : هي عم تشتغل هالشغلة .وأنا دفعت وفتت، ولما بلشت تذكرت إنو هاد الصدر
رضعان منو
الأول : ليش ماوقفت
الثاني : كل شي في وقف ..بس مافيني أنا وقفت .بعدين هي
الأول : إخراس (يوجه المسدس )
الثاني : إخراس إنت (يلاحظ نزول برميل من الطابق الثاني ،يوجه صوبه المسدس
يرتعب الأول )
الأول : شبك ليش عقدت جبينك ، بدك تضرب عنجد . عم نمزح شبك اهدا (موسيقا
ترتفع حتى لحظة الإطلاق ،الأول يعتقد الطلقة جاءت فيه ولكن الطلقة تصيب
البرميل الذي يشر منه الماء على وجه الأول المرعوب .هنا تظهر فتاة جميلة ،
يقتري الإثنان من البرميل بحذر)
الفتاة : (يدها المخفية تبدأ بإظهارها تدريجيا والإثنان حذران إلى أن تظهر باقة بقدونس
تقدمها للثاني وبصوت يبدو عليه التأثر)هي إلك (الأول ممتعضاً، تخرج باليد
الثانية باقة أخرى تقدمها للأول ) وهي إلك (ثم تخرج خيارة كبيرة ) هي إلكون
انتو الأتنين (ثم تخرج ليتر ويسكي ) وهاد إلنا كلنا (يصرخ الثلاثة فرحا وتبدأ
موسيقا الاحتفال والرقص وتحضير طاولة السهرة وبعد مضي وقت الرقص
والشرب تتغير الإضاءة كمؤشر على تغير المشاعر )
الثاني : (حالة سكر ) شو رأيك بطالع نازل ..
الأول : (حالة سكر ) اخراس ! هي من اختصاص رايح جاي (يضحك الإثنان)
الفتاة : إخراس إنتي وياه أنا اختصاصي هات وخود
الأثنان معا : هات وخود
الفتاة : بلا رايح بلا جاي
الإثنان معا : هات وخود
الأول : مو انتي جارتنا اللي فوق ؟
الفتاة : فوق ولاّ تحت ماتفرق
الثاني : معقول ؟!! عيلتك أوادم
الفتاة : (بتأثر مصطنع) حالتنا فقيرة كتير ...وأنا عم أدرس بالجامعة وما في مين
يصرف علينا ..البابا بيشتغل بواب بناية
الثاني : شغلة شريفة
الفتاة : والماما خياطة
الأول : (ممدودة ) خياااطة
الفتاة : بدي كفي دراستي ونعيش
الأول : هات وخود
الفتاة : (بيأس مصطنع) مافي غير طريق
الثاني : لأ في
الفتاة : دخيلك دلني عليه
الثاني : طالع نازل (يضحك الإثنان ) بتروحي من هون لهنيك (يؤشر إلى خلف الستار)
الأول : هاد الطريق سالك بسهولة ، رايح جاي (الفتاة تدخل خلف الستار الأبيض وتبدأ
بخلع ملابسها ويظهر ظلها .وكذلك يبدأ الأثنان بخلع ملابسهما على إيقاعات
الموسيقا وبعد أن ينزعان ثيابهما الخارجية يظهر لنا أنهما موضوعان داخل شبكة
من الجنازيرومقفلة وقد تدلى قفل كل واحد خلف ظهره ،يصعق الأثنان وخلال
حوارهما التالي سيتابعان بنظرهما الفتاة التي تتأوه وتنتظر )
الأول : وين المفتاح ؟
الثاني : وينو ؟
الأول : دور هون
الثاني : دور هونيك (يدخلان داخل دوامة في البحث عن المفتاح مع الموسيقا والإضاءة
التي تشير إلى انتهاء استثارة الفتاة حينها يكتشف الإثنان أن المفاتيح معلقة في
يديهما )
الأول : بسرعة خليني افتحلك
الثاني : لأ أنا بفتحلك أول
الأول : لأ أنا رح افتحلك (يبدأ الإثنان بحالة الرقص مع الموسيقا حيث يفتح كل واحد قفل
الآخر ويتكومان في وسط المسرح منهكان ينزل عليهما قفص يغطيهما ،يدخل
رجل في الخامسة والأربعين ،يرفع عنهما القفص يظهر لنا طفلان صغيران
يلعبان ثم يبكيان . يحاول الرجل ملاعبتهما لكنه يضجر سريعا )
الرجل : (ينادي لأحد ما في الداخل ) شهيرة (تدخل نفس الفتاة السابقة ولكن بلباس شغل
البيت )سكتي ولادك (المرأة تهدهد الطفلان ولكن لا يسكتان ،يصرخ الرجل )
سكتيون
المرأة : أمرك ..أمرك ..بس روق ...روق ياعمري
الرجل : طلع صوتي شوي ماهيك
المرأة : ماطلع ولاشي لاتهتم
الرجل : (بهدوء مصطنع) لا طلع شوي ..لا تواخزيني .بتعرفي قديش ..
المرأة : (تقاطعه) ماطلع ابن عمي ماطلع
الرجل : (يصرخ منفجرا) لأ طلع ...طلللللللع
المرأة : (مذعورة) طلع .طلع
الطفلان :(معا ) طلع كتير
الرجل : (وحيدا) ما في عم اتحمل ..كل شي كنت راسمو لحياتي .صار عكسو
.ليش؟؟(يبكي )
المرأة : (تضعه في حضنها ) لا تبكي ياعمري ..يا ضو عيوني ..أنت كبير ..كبير ..
(يبكي )اهدا ..اهدا ..تطلع على قبري انشا الله (تغني ) يالله تنام
الطفلان : (معا ) لالالاااااااااا

المرأة : ريما ريما الحندقة
الطفلان : (معا)لااااااااا
الرجل : (يرفع رأسه) لكن شو؟؟
الطفلان : ( يلعبان ويغنيان) إنت إلي شيري شيري
المرأة : أنا بحبك شو ماكنت تكون .. لاتهتم ولا تعقدا ،ليكنا عايشين وعين الله علينا
الرجل : (ينهض من حضنها ) وهي عيشة تضربي إنت وهالعيشة
المرأة : بالعكس أحلى عيشة وشو بدك هي الله رزقك أحلى طفلين بالعالم (في هذه
اللحظة يكون أحد الطفلين يبصق على أخيه والآخر يصفعه على خده )
الرجل : تضربي ..من يوم اللي شفتك ماشفت الخير .إنت دمرتيني ..دمرتيلي حلمي
الحلم اللي حلمت فيه على طول ..الله يرحمو أبي كان يقول :
(أحد الطفلين يأخذ دور الأب والآخر الإبن )
الطفل الأب : انت يا رضا بدك تصير شغلة كبيرة كتير
الطفل الإبن : (بصوت طفولي ) يعني كبيرة متل الجحش
الطفل الأب : لا يا بابا اسماع :إنت بدك تسهر والناس نايمين
الطفل الإبن : عرفتا لمبة
الطفل الأب : لا ياحمار .بدك تصير شي زعيم أو امبراطور
الطفل الإبن : التور (يقلد الصوت )
(نعود للرجل وزوجته)
الرجل : امبراطور ...سمعتي أنا امبراطور
المرأة : وإنت هلق أحلى امبراطور على مملكتنا اللي هي بيتنا
الرجل : ولم منين عم تجيبي هالحكي إذا لا بتطلعي ولابتفوتي ولا بتروحي ولا بتجي
الطفلان : (معا) هات وخود
الرجل : هاتي لشوف فهميني إنت شو عم تدخلي ؟
المرأة : (خجلانة ) بس ...يوه
الرجل : شو عم تدخلي ؟
المرأة : بس يا الله
الطفلان : (معا) ولك للبيت شوعم تدخلي ؟
المرأة : للبيت ؟!. شو بدي دخل ..والولاد مين بدو يشيلون ؟
الرجل : رجعنا لنفس القصة ..تضربي منك إلون ..
المرأة : (بدأت تنرفز) شو بدي اشتغل ؟
الرجل : في مليون شغلة تشتغليها
المرأة : (بعصبية) طول عمرك عللك بتحطها بغيرك ..إنت شو عم تعمل غير عم تحلم
تصير امبراطور .مو هاد الشي اللي ورثك ياه البابا
الرجل : إيه بدي إحلم وحلمي بدو يتحقق ..
المرأة : احلم احلم بس اللي بدو يحلم بدو يكون مستند ع شي .ولك بدك تصير امبراطور
وانت شهادة مامعك .
الرجل : مو شرط الدكتور يصير امبراطور
المرأة : صحيح ، بس انت ما بتعرف شي
الرجل : مو لأني ابن الطبقة العاملة يعني ما بعرف ،لأ بعرف كلشي والشعبية هي نجاح
أي امبراطور
المرأة : (باستهزاء) وانت إلك شعبية ؟
الرجل : فيك تنكري إنو كل شي بالبناية بيحترموني وبيعزوني
المرأة : لأنك بواب البناية ...لأنك بطلعلون كياس الخضرة واللحمة ع شققون ونحنا ما
بينالنا غير ريحتها ..لأنك بتغسلون سياراتون ونحنا ما بينالنا غير الزيت والشحم
واغسلي يامرا ..لها الشي شعبيتك قوية .
الرجل : يعني هلق إذا صار انتخابات مابينجح
المرأة : بتنجح .!بس شحط
الرجل : (منرفزا) عم تتمسخري ،نسيتي مين أنا ..صحيح مامعي شهادة بس مابأثر
هالشي ع تاريخي النضالي
( ننتقل إلى الطفلين اللذين يأخذ أحدهما دور المحقق والآخر المتهم )
الطفل المحقق : انت متهم بالتآمر ع مصالح الوطن من خلال تعاملك مع جهات أجنبية
مشبوهة .
الطفل المتهم : (مرهق ومعذب) ما حدا بيحب الوطن وبيحرص ع مصالحو قدي .لا انت
ولا مليون واحد متلك فيه يتهمني بالخيانة .
الطفل المحقق : نحنا مراقبينك من زمان .تحركاتك مشبوهة وعلاقاتك مشبوهة ،نظرتك
مشبوهة ومشيتك مشبوهة ..انشا الله مفكر مامنعرف وين عم تجتمعو
ووين عم تطبعو مناشيركم وين عم ترموها أو بكم ترموها
الطفل المتهم : مشاء الله حافظ درسك ع التمام
الطفل المحقق : أكيد حافظو وإسآل أي سؤال
الأب : (بيده كتاب) ماذا يعني الشاعر بقوله نحن قوم جُثّمٌ ؟
الطفل المحقق : يعني نحن قوم مرفوعين الرأس
الأب : حمار (يصفعه)
الطفل المتهم : يعني قوم منبطحين
الطفل المحقق : (يصفع الطفل المتهم ) عمرك ؟
الطفل المتهم : عشر سنين
الطفل المحقق : إيمتا بلش ارتباطك بالجهات المشبوهة ؟
الطفل المتهم : أول ما فطمتني الماما
الطفل المحقق : ضبطوك إنت وعم ترمي مناشير عند باب المدرسة
الطفل المتهم : هي مو مناشير .شي خلص العام الدراسي شقيت كتبي لأني بكره المدرسة
الطفل المحقق : وليش كنت شالح بالزلط أول ماداهمت الدورية البيت واعتقلناك
الطفل المتهم : كنت شي طالع من الحمام والماما عم تنشفني
الطفل المحقق : (لأحد ما) خدو وشلحو متل ما كان طالع من الحمام وأنا فايت نشفو
(يدخل الطفلان خلف الستارة البيضاء)
(نعود للرجل وزوجته )
الرجل : (يبكي في حضن زوجته )
المرأة : لاتبكي ياعمري لاتبكي ..وحياتك رح عوضك عن كل شي
الرجل : (ينتفض من حضنها ) وشوفيك تعوضيني ، ما في غير هالكلمتين (يقلدها ) رح
عوضك عن كلشي .من ما التقينا لليوم وانت عم تقولي رح عوضك
المرأة : وشو فيني إعمل ..أنا جناح مكسور
الرجل : إنت ؟! حية من تحت تبن
المرأة : الله يسامحك
الرجل : (منرفزا) الله لا يسامحني ..كرهتك ...كرهت طيبتك ..ارصرخي ..بهدليني ..
اضربيني ....انفجري ...
المرأة : ليش من يوم الـ أخدتك خليتني افتح تمي ..شغلتني ببيوت الناس خدامة ،ضليت
ساكتة ...عم ربي الولاد واطبخلك وانفخلك وارقصلك بآخر الليل وساكتة ‘
شغلتني شر (تتوقف) شغلت الناس فيّ على كيفك وأنا ساكتة
الرجل : ومبسوطة
المرأة : فشرت ..ولا مرة كنت هيك ..مرة حبيت فيها كون مبسوطة طلبت منك تنام معي
بتتذكر وقتا شوساويت !!
الرجل : ما فيني نام معك
المرأة : وكيف عم تنام مع غيري
الرجل : (يصرخ باكيا) مو أنا عم نام .هني عم نامو معي ..أنا وأنت منشبه بعضنا
(يبكي)
(تفتح الستارة البيضاء على مقعد حديقة يجلس عليه شاب وفتاة)
الفتاة : بحبك ..بحبك بتعرف شويعني بحبك
الشاب : بعرف
الفتاة : يعني هاد الحب ما لازم يضل عايش بالهوا
الشاب : وحياة عيونك مارح يضل الوضع هيك ، كل شي رح يتغير ..بس شوية وقت
الفتاة : ولشو الوقت ؟
الشاب: مابدي لاقي شغل ..وبيت ..وفرش بيت ..لشو مستعجلة ع الزواج ؟
الفتاة : حابة ننام سوا ع مخدة وحدة ايدك عم تعانقني وإيدي عم تغطيك
الشاب : رح ننام بس طولي بالك (يمسكها بوجهها) وحياة العيون رح تكوني أسعد وحدة
بالكون ( قطع نعود للرجل وزوجته )
المرأة : ما شفت يوم هنا معك
الرجل : يبعتلك عما لا تنفجري عيونك إنت وعم تحكي معي . وطي راسك خلي
بالأرض ..(قطع نعود للشاب والفتاة )
الشاب : وحياة كل أخضر حوالينا رح خلي راسك عطول مرفوع وأنت عم تفتخري في .
الفتاة : وحياة حبنا مارح تسمع مني غير الكلام الحلو الـ متل العسل (قطع)
المرأة :(تتلقى ضربة من الرجل ) إنت حيوان ..هاد اللي شاطر في يا بغل
الرجل : إنت وحد واطية شر(يضربها ثم قطع )
الفتاة : بحبك بحبك
الشاب : بحبك بحبك بحبك (تختلط الأصوات بين المشهدين)
الفتاة : إنت عمري
المرأة أنت نكدي
الرجل: أنت صرماية عتيقة
الشاب : إنت وردة عمري
الفتاة : الله يخليلي ياك
المرأة : الله يريحني منك
الشاب : إنت حلمي الأخضر (قطع ،يخرج الشاب والفتاة نشاهد خلفهما لوحة كتب عليها :
/ممنوع دخول الفتيات إلى الحديقة منعا باتاً/
الرجل : ولك شو عجلك ع الزواج ،القي إذا بتلقي
المرأة : حطيتلي كرامتي بالأرض
الرجل : إنت اللي بهدلتيني يا شرشوحة (يهدأ) بس رح ريحك مني (لوحده )صحيح أنا
مكاني موهون ،أنا ماخلقت لكون رب أسرة مشرشحا ..أنا خلقت لكون
إمبراطور ...إمبراطوووووور (موسيقا امبراطورية،يبدو كأن الرجل تقمص
حالة الإمبراطور ) أول قرار صادر عن الإمبراطور (يلتفت للمرأة)أنت
طالق..طالق .. طالق ...
المرأة : شو؟
الرجل (الإمبراطور): مابيصير تكون زوجة الإمبراطور عاهرة (يضحك)بعدين الشعب
بحطلي قرون
المرأة : منشان تعيش إنت وولادك .. منشان تكون رضيان
الرجل (الإمبراطور): أنا هيك رضيان وبعد ثواني لازم الإمبراطورية تنضف منك
المرأة : بس مارح تنضف رح يضل نجسة
الرجل (الإمبراطور) : ليش؟
المرأة: لأنو فيها واحد وسخ متلك نجس متل حقير متلك واطي
الرجل(الإمبراطور): إخرسي إخرسي عم تشتمي رمز الإمبراطورية (ينادي) يا حرس
(يدخل نفس الشخصيتين الطفلين على هيئة بلطجية ) امسكوها
وحطوها بالسجن بتهمة الخيانة العظمى وعاملوها معاملة خاصة
خاصة جدا ..يعني مسموح كلشي....
(يأخذ الطفلان المرأة خلف الستارة البيضاء ويبدآن بتعذيبها،الإمبراطور لوحده وعلى موسيقاه الإمبراطورية يبدأ خطبته لشعبه )
الرجل (الإمبراطور): يا شعب إمبراطوريتنا العظيمة : عندما قررنا الحرب .كان هدفنا استعادة ماسلب منا .لذلك أردناها حربا مفتوحة ..مفتوحة ولكني أقسم بدماء أجدادي بأنني سأعيد لكم ماسلب منكم ،ولكن ماهو الشئ الذي سلب منكم بعض الملاعق والشوك والسكاكين ،مالمشكلة ؟!نأكل بأيدينا (تصفيق) ماذا سلبوا منكم بعضاً من ملابسكم . وشو هالهم منطلع بالزلط (تصفيق) سلبوا أحذيتكم ؟!منمشي حفيانين (تصفيق) سلبوا رجولتكم؟
وشوبتلزمكون قصدي شو بتلزمنا ..الإشيا النافرة مش مرغوبة.ابتعدو عنا (صورة تعذيب المرأة في الخلفية ) كل الأمور في طريقها للحل بس اللي فيني أوعدكون فيه من اليوم كل انسان حر بحالو حر بمواقفوا حتى لوكانت ضدي شخصيا ..القانوووون فوق الجميع أقصد صوت القانون فوق الجميع (التعذيب مستمر مع نقرات عزف على آلة القانون، تصفيق حاد )
بدي إلغي قانون الجوارح والكواسر مافي جيم ومافي كيم ومافي سيم كل الحروف رح تنحط بمكانها الصحيح مافي حرف رح يفوت ع التاني السين سين والنون نون والعين عين والميم ميم والرا را وكل رح يرجع يتعمر وعمار يا بلدي عمار (تصفيق حاد)
( يخرج البلطجيان بلباس لونه أخضر كلباس غرفة العمليات )
أحدهم : دكتور ..استئصلنا المرارة بس الزايدة ماعم ترضى تطلع
الرجل الدكتور : (يلبس مريول أبيض)
الثاني : العين اليسار طلعت لحالا بس اليمين علقانة جوا مع شي حدا
الرجل الدكتور : المهم .. اعترفت (يصلح )بقصد صحت يعني رح تعيش
أحدهم : قصدك رح يعيش
الرجل الدكتور : لأ رح تعيش
الثاني : والله رح يعيش
الرجل الدكتور : ليش مو رح تعيش
الإثنان : (معاً) طلع دكر
الرجل الدكتور : (متفاجئاً) دكر ؟؟!!!! معناتها طلعت دكر
الإثنان : لأ طلع دكر
الرجل الدكتور : (بعصبية) المهم وخليتولو(يشير لأعضائه)
أحدهم : لأ شلناهون
الثاني : الإشيا النافرة مش مرغوبة
(يخلع الرجل الدكتور المريول ، ويتحرك الثلاثة باتجاه البرمبل الذي يعاود النزول وعليه بطيخة كبيرة ، يتحلق الثلاثة حول البرميل بعد أن يلبسون خوذهم المصنوعة من البطيخ ، الرجل الإمبراطور بيده سكين حيث يضع يده على البطيخة ويبدأ)
الرجل الإمبراطور: بشوف إنو هي المنطقة أهم بكتير ..لأنو انتبهو ع شو بطل
أحدهم : سيادتك شايف هيك أنا معك ،بس لو أنو نجرب هاي المنطقة بيجوز تكون
حظوظنا أوفر ..
الثاني : سيادتك وسيادته شايفين هيك وأنا معكون بس هون مربط الفرس .، هون ممكن
تكون مكاسبنا أكبر .
الرجل الأمبراطور : طيب رح نجرب الإقتراحات التلاتة (يبدؤون بفتح البطيخة من ثلاثة أماكن وبعدها يأخذ كل واحد حصته ويأكلها وخلال الأكل )
الإمبراطور : اقتراحك ما اشبو شي
أحدهم : وإقتراحك ما اشبوشي
الثاني : واقتراحك مااشبو شي
(الثلثة يضعون أفواههم مكان القطع ثم يدؤون بالإلتهام الوحشي مع أغنية أسمهان
أنا اللي أستاهل كل اللي يجرالي ، يوقفها الرجل الإمبراطور )
الرجل الإمبراطور : بيكفي (يحمل البطيخة) بدي روح ارتاح شوي (يضحك) بعد
هالمعركة ..
أحدهم : وين وين ....؟ ولشو أخدها معك ؟
الرجل الإمبراطور : هي إلي
الثاني : وين ...ع مهلك شوي ما بتطلع من هون إلا على جثتي شو مفكرها مطوبة على
اسمك
الرجل الإمبراطور : إيه شو ما بتعرفو ؟
الإثنان معا : شو؟؟!!
الرجل الإمبراطور : إنو ورثتا عن أبي وجدي وعيلتي
أحدهم : إيه حطها من إيدك وروح نام
اللإمبراطور : مافيني نام إذا م كانت معي
الثاني : لأ فيك ... تركها من إيدك متل ما تركت غيرها
الإمبراطور : ما بتركها واللي بدور يصير يصير (يشتبك الثلاثة مع صوت إطلاق رصاص ،تدخل المرأة على هيئة معلمة بيدها دفاتر وتلبس جلبابا أسودا مع حجاب على الرأس )....
المرأة المعلمة :قيام (الضجة مستمرة) بيكفي .بس إنت وياه وياه ..
(يضعون البطيخة مكانها ثم يلبسون لباس المدرسة ويجلسون في المقعد) افتحوا كتبكم ..درسنا اليوم حياة الزرافة
الثلاثة : (معاً) لأ آنسة..
المرأة المعلمة :(مرتبكة) الدودة الوحيدة
الثلاثة : (معاً) لأ آنسة.
المرأة المعلمة : (بيأس) طيب ..التكاثر الجنسي عند الكلاب ..
الثلاثة : (معاً) لأ آنسة
المرأة المعلمة : (بعصبية ) عند الإنسان ؟؟؟
الثلاثة : نعم آنسة .
المرأة المعلمة : إدرسوا بالبيت
الرجل الإمبراطور : ولشو عم نفتحلكون مدارس
أحدهم : للتسلاية
الثاني : شو بدكون تقبضو معاشات ع الفاضي
الإمبراطور : يلا بلشي بالدرس وإلا بحولك ع التحقيق
المعلمة : (مستسلمة) ماشي ، افتحو كتبكم ع الدرس
الثلاثة : (معاً) فاتحينو آنسة
(على الستارة البيضاء يظهر رسم تخطيطي للجهاز التناسلي عند المرأة)
المعلمة : شايفين الرسم
الإمبراطور : أوه تمام
الإثنان : (معا) نحنا مو شايفينو آنسة
المرأة المعلمة : كيف هوي شايفو وانتو لأ
الإثنان : (معا) هوي عندو بعد نظر آنسة
المعلمة : (تغير الرسم إلى رسم فحص العيون ولكن على هيئة رؤوس بشرية) هي لوين
الإثنان : لـ تحت
المعلمة : وهَيْ ؟
الإثنان : لـ تحت
المعلمة : وهَيْ ؟
الإثنان : لتحت
المعلمة : وهَيْ ؟
الإثنان : لليسار
الإمبراطور : فشرت إنت وياه هي لليمين
الإثنان : لأ لليسار
الإمبراطور : لليمين
أحدهم : هي لليسار واللي بدك تعملو اعملو (تحث مشكلة وفوضى )
المعلمة : إنتو حوش ..ضيعان العلم فيكون (تخرج)
الإمبراطور: تضرب منك إلو طفشتوها ..وين رايحا عليك حقوق
(يبقى الطفلان وسط المسرح واحد ذكر والآخر أنثى يرسمان على ورق
مبعثر حولهما )
الذكر : شو عم تعملي
الأنثى : عم إعمل مسدس
الذكر : وأنا رح إعمل مسدس بس يكون بيقوس
الأنثى : وأنا مسدسي بيقوس
الذكر : بس مسدسي بيقوس أكثر (يختلفان ، نشاهد الرجل والمرأة من خلال الستارة
البيضاء ونسمع صوتيهما ،قطع)
المرأة : إنت ولا شي ..نكرة
الرجل : أنا لأني أخدتك صرت ولا شي
المرأة : يعني ع أساس كنت شي دكتور
الرجل : كنت إنسان ومن يوم فتحت هالبيت تحولت لحيوان بيشتغل أربع وعشرين ساعة
منشانك ومنشان ولادك .
المرأة : وأنا عم اشتغل بس هاي الشغلة ماعد فيني اشتغلا .لاقيلي شغلة تانبة
الرجل : هي هي شغلتك وشغلة إمك وكل عيلتك ملاتفكري إنك تتركيها لأنو هي الشغلة
هي اللي رح ترفعنا لفوق ..افهمي يا غبية ..
المرأة : ماعاد رح اشتغل هالشغلة واضروب راسك بالحيط
الرجل : بدك تشتغلي ورجلك فوق راسك (يضربها ،نقطع ونعود للطفلين )
الذكر : شو رسمتي ؟
الأنثى : رسمت غابة..وانت شو رسمت ؟
الذكر : أنا رسمت بيت
الأنثى : فرجيني ... ياه حلو كتير ..جيبو حطو بالغابة
الذكر : (يناولها الرسم ) خديه (قطع ، نعود للرجل والمرأة)
الرجل : البسي وروحي لعندو
المرأة : مارح روح ... مارح روح
الرجل : بدك تروحي وبدك تدبريني عندو
المرأة : دبر راسك لوحدك .(قطع ، نعود للذكر والأنثى)
الذكر : شو رسمتي
الأنثى : حطيت بالبيت عروس وعريس
الذكر : فرجيني
الأنثى : شوف هاد إنت وهاد أنا
الذكر : أنا العريس وإنت العروس
الأنثى : إي بالبيت جوا الغابة .. بس رح نرسم عصافير
الذكر : (يرافق كلامه زمجرات حيوان مفترس) ما بيصير تكوني إنت العروس وأنا
العريس .!!
الأنثى : ليش ما بيصير ؟
الذكر : لأنو ما بيصير الأخ يجوز إختوا ..حرام
الأنثى : وليش الزلمة بيتجوز مرتو مو حرام ؟
الذكر : (مرتبكا ينظر حوله) زلمي ...مرتو ..خلص حرام
الأنثى : (تتابع على الورق) لأ موحرام ... رح نجوزون لبعضون ..
(صوت رعد وبرق والطفلان مذعوران )
الذكر : شفتي ... الله زعل منا
الأنثى : بيجوز زعل لأنو نحنا هون عم يشوفنا .. تعا نفوت لهنيك ونجوزون .. هيك
ما حدا بشوفنا ..
الذكر : ( زمجرة حيوان مفترس ) لهنيك ..طيب إمشي (يحبوان على أربع خلف الستارة
البيضاء) (قطع نعود للرجل والمرأة)
الرجل : أنا الأمبراطور وكل أوامري لازم تكون مستجابة
المرأة : إنت مجنون اتركني اتركني (يظهران المرأة مربوطة بحبل والرجل يجرها
خلفه)
الرجل : بدك تروحي وبدك تنبسطي وتبسطينا
المرأة : أنا هالشغلة ماعاد اشتغلا يا تور
الرجل : امبراطور مو تور تحكي (يدخل الطفلان ،الأنثى حامل والذكريضع على رأسه
قبعة كاوبوي )
الذكر : (يبكي ) ماما لا تروحي .,خليك عنا
الأنثى : (تبكي) خليك هون منشان تديري بالك علي
الرجل : فوت إنت وأختك لجوا
الذكر : مارح فوت واللي بدك تساويه ساويه
الأنثى : مارح نفوت إلا مع الماما
الرجل : (يفقد السيطرة ) فوتو لجوا ( يسحب السكين ) وإلا بدبحكون هون
المرأة : (ترتعد) فوتوا ماما
الطفلان : لاأأأأأ
المرأة : طيب رح روح بس فكني بالأول
الرجل : إي ها من الأول يلعن أبوك (بعد أن يفكها تركض باتجاه المسدس في وسط
المسرح وتحمي طفليها )
المرأة : وهلق فيك تتركنا بحالنا وتطلع برا البيت
الرجل : (يضحك) عم تخوفيني .. والإمبراطور من مدافع ما خاف بدو يخاف من سدس
فشينك
المرأة : اسمع مني وانفد برشك وشفلك شي مملكة تانية صير عليها إمبراطور ومسامحتك
بكل .. هون ماعاد تنفع
الرجل : (يضحك بطريقة هيستيرية) أنا هون خلقت وهون صرت إمبراطور وهون بدي
موت..
المرأة : إنت أجبن من إنك تموت .. هالمرة مارح اسمحلك تخدعنا .. بيكفي خدعتنا كل
هالسنين
الرجل : (يهجم عليها ) أنا .....................(ها ها
(طلقات الرصاص تأتي من كل مكان ، يتهاوى الرجل تدريجيا في وسط المسرح ،يلاحظ المرأة في جهة والأنثى في جهة والذكر في جهة والستارة البيضاء تتلون بالأحمر. تعتيم )
الرجل : (وهو يتداعى وبصوت متقطع) أنـ ا البـ وا ب .....
******* النهــــــــــــــاية *********

مولود داؤد
سلمية في 5/10/2008

أستاذ مهتدي :
شكرا لك ,وأنا بانتظار رأيك وجميع الآراء التي سأسمعها جيدا .....
مع محبتي
مولود