منع سير الدراجات النارية في سلمية

في مطب بشارع المساكن التاني مرة شفت طرطورة طارت شي خمس متار لقدام وحطت بكل ثقة وتابعت بكل جرأة تحت ظل اندهاش اصحابها ياجماعة المطبات بسلمية شي متل الكذب خرج نحط كميرا خفية تصور العالم يعني بما انا بتعمل حوادث اكتر ماتمنعا

المتور يا احباب لا يمكن الاستغناء عنه لاهالي المدن الصغيرة والقرى والمناطق الزراعية

ويكاد لا يخلو بيت من متور او اثنين

انا اقترح ان يوضع للمتور نمرة مقيدة عند مديرية المنطقة في حال حدوث اي حادث من قبل صاحب المتور مثل دحم او سرقة او غير ذلك تفيد النمرة في التعرف عليه

المشكلة متل ماقال زاركافا
وانا بيتي على شارع رئيسي وعانيت من المتورات كتير والمشكلة كانت دائما من الرعونة والشخرات والى اخره من المظاهر المميزة للمتور السلموني وبالمقابل كان في ناس بتمر بكل احترام من الطريق حتى يكاد لايحس بها احد
اذا المشكلة بالبشر وليس بالحجر

المشكلة ما لها حل الا بمنع المتورات نهائيا
لأنو أغلب سائقي المتورات من المراهقين ...يعني ما بيسمع الكلمة ولا بيتعلم
وصحيح أنو بعض الناس بتسوق ومحترمة الطريق بس المشكلة صارت أكبر وأخطر وأي قرار ممكن يضر بعض الناس لكن نحنا بدنا المصلحة العامة
بدنا سلمية هادية وخالية من الحوادث والمصايب
وقرار منعها من الشوارع الرئيسية قرار مانو حكيم لأنو بيزيد الضغط على شوارع الأحياء المليانة اولاد
والحل بالنقل الداخلي المنظم بحيث يغطي كل مناطق المدينة بطريقة صحيحة
وعندي سؤال
يعني اذا امنعت المتورات نهائيا رح توقف الدنيا

المنافس انا لا اختلف معك في ماتقول لكن سيمر وقت طويل حتى يتحقق ماتقول

ما حدا يناقشني لازم يمنعو المتورات اللي مو مرخصة وبس
لأنو اللي بدون ترخيص عم يوصل للي ما خلق شي بيخطو شويربو بدو يركب متور ولما بيكون في ترخيص ولوحة رسمية بيكون في رخصة قيادة لأعمار فوق المراهقين متل كل بلدان العالم ومن شان ما نفكر كتير بحلول غير صحيحة وندخل المتور لأحيائنا الضيقة وتصبح الحوادث على أبواب المنازل...
وشكرا

اذا انمنعت المتورات بيصيرو المراهقين يشفطو على البسكليتات وبيصيرو عباقرة ليلاقو طريقة يعملو فيا ضجة
لهيك انا بأيد زاركافا شوية ترباية وكم قانون يفرض هالترباية بيمشي الحال

معكم حق بكل ما كتبتوه
ولكن قبل توعية وتقديم النصيحة للمراهقين
يجب ان ننصح الاهل فهم الملامون بالدرجة الاولى
لانهم هم الذين يقومون بشراء نعوش ابنائهم بانفسهم
واسمحوا لي بتسمية المتورات بالنعوش
لانها فعلا كذلك
فلو التزم كل اب او ام بعدم تلبية هذا المطلب لابنه لاستطعنا عندها
حصر قيادة المتورات بمن هو راشد وعاقل وغير متهور
تقبلوا مروري

مرحبا ياشباب
لازم تكولوا بالكم شوي ..
اللي عم يروحوا هني شبابنا ..
وممكن يكون واحد ملتزم كل ادبيات القياده بس يطحشوا شي واحد غبي ومتهور ..
للي ماعندو علم بانه في سلميه من تاريخ 1\3 حتى 30\4\2009
11شاب توفوا بحوادث
وفي الاشهر السته الاولى 23 شلب توفوا اكبرواحد عمره 37سنه
و112 اعاقه يعني اصابات دماغيه واللي مو مصدق ممكن اعطيه اسماء انا مسجل كل الحوادث
يعني عنا اكتر من انفلونزا الخنازير اللي البشريه مرعوبه منو ...
الحلول المقترحه واضحه زوجريئه ..بس ماحدا داير
ممكن تنمير الموتورات بشكل مؤقت في سلميه يكون حل وبينعرف المخل ووومكن يتعاقب وينسجن حتى ومنشان مانضحك على حالنا مين رح يفكر بهالقرار طالما الشرطه مستفيده والتاجر مستفيد والمهرب مستفيد واكتر حدا رح يتضرر
والدوريات اللي بتجيسلميه وتعمل حملى مصادرات هي فاشله مسبقا لأنه قادره على مصادرة موتور لواحد ختيار ..واحد عم يوصل مرتو والاده.واحد محترم حالو ..أما الشقلعي ) ماحدا فيه يمسكوا ....وكلنا بنعرف هالحكي

شبابنا بنضل نلوم شبابنا .....خلونا نلاقي محل كمان يفرغوا فيه طاقاتهم
عنا نادي متل العالم ..عنا مقهى ..عنا كافتيريا ...
بزمانه الشيخ زايد شكولوا التشفيط بالسيارات في مدينه العين واقترح المشتكين قاءئمة عقوبات...فرد عليهم اعملوا نادي لسباق السيارات ومهارات القياده
الله لايضر حدا بس هي الحوادث اي حدا منا معرض الها ..اللي راكب موتور واللي راكب سياره واللي ماشي بالشارع
وبسلميه المتور ضروره لأنو مافينا نشتري سيارات
ولو واحد فيه يشتري سياره ...بتتقرقع من اول شهر بسبب جودة الطرقات

ربما اطلت كثيرا لكن اعذروني انا اعمل في مجال علاج المتضررين من الحوادث ..وعم شوف شغلات اللي لايصيب حدا بتعرفوه بمكروه ..
ولكن الحلول الجديه عم تمر من تحت الاطاوله وماحدا عاطيها اهتمام ..
والحلول الاهليه بمشكله مستعصيه متل هيك بتكون رديفه وثانويه مو اساسيه طالما مافي قانون يحكم المخالفين في الدراجات ..
بدها مشاركة الكل ..
الاهل والمدرسه والجمعيات والمخاتير والشرطه والبلديه



تقبلوا محبتي ..

نيروادا مشكور كلامك منطقي
بدي اسألك بما انك بتعمل مع المتضررين من الحوادث ابني بيضل يعمل حوادث سير وبيوقع على راسو دائما شو بعملو لاماعم امزح عمرو سنة وشهرين وعم يركض ويتعشبق على الطاولات والكنبايات وبيوقع كتير راسو صار هضاب وجبال ايمتا لازم خاف عن جد او اخدو على طبيب ومافيني هدي كتير حرك طبعا دائما في احتياطي تلج وانا متوترة 24 ساعة مشان وقعاتو

مرحبتين ام شمس ..
بالنسبه للصغير الله يخليه ..
وهو اكيد خارج الموضوع ..بس ولايهمك ..كونه طفل رح يضل يوقع وانت ماعليك الا الحذر وابعاد الاشياء المؤذيه عن تناوله قدر المستطاع ..
(مثلا عدم وضع المكوايه بمكان يصل اليه او ابريق ماء مغلي ..او ادوات زجاجيه )
ومحاولة عدم شطف البيت الا وهو نائم

اما عن التسلق اتركيه يعرف بنفسه ويكتشف فكل محاولاتك لمنعه ستزيد رغبته بالاكتشاف


تقبلي تحياتي

سمعنا الاقنون وما تطبق منو شي عالقليلة لوقت اللي كنت موجود هنيك قبل كم يوم
الحل هو ترخيص كل الموتورات الموجودة وفرض استخراج شهادات سواقة وتكون التكاليف بسيطة خلال مهلة محددة وهيك بينقضى على ظاهرة الموتورات المهربة وبتصير الموتورات مثل السيارة نظامية وكل شخص مسؤول عن دراجته وحتى سرقتها بتخف مشكلتنا دوما مندور على الحل من الراس ومنترك سبب المشكلة الاساسي ومتل ما قالو الشباب فوق انو كمان التربية الها دور مهم بكل النواحي مو بس بشغلة الموتورات ولا السيارات لما بيتحدد مثلا عمر السائق وبينفرض يكون عليه شهادة وبيصير يتطبق عليه قانون المخالفات المرورية ... الخ بتصور بيكون الوضع أفضل...

مشكور للخبر