احلى شوفة

بدي احكيلكن على شوفة مبارح شفتا مع زوجي وابني رحنا على منطقة حد برج دبي تماما شي مذهل تماما وماعم احكي على البناء لانو اكيد الكل سمعانين عن العمارة المذهلة هون
بس عاملين بحيرة كبيرة والناس كل نص ساعة بيجتمعو لانو ببلش عرض قمة بالروعة يعني متل النوافير بتصير تطلع المي عم ترقص لارتفاعات عالية مع اضواء ليزرية بشكل متناغم على انغام موسيقية مذهلة من كافة انحاء العالم شيء مذهل تماما بتحس حالك عايش بحلم مو حقيقة ومدة كل عرض تلات دقائق خاطفين للانفاس ياريت لو فيني جيب كل سلمية يشوفو سحر البشر لوين وصل

والله من سنتين كنت بدبي بس كنو جديدة شكرا ام شمس

عفكرة انا افتكرت انو هادا الشي موجود بس ب لاس فيغاس!؟ فعلا شئ رائع لما بتشوف المي عمترقص عالموسيقى، و لكل أغنية فيه رقصة غير! وانا كمان بتمنى كل الناس تشوف ماأحلاها، ولهيك نزلتا عالفيس بوك، بس ماابيفتح بسوريا
مع احترامي ماهر.

أخي بشير، هيي فعلا رائعة، بس جمالا بحركتا لهيك بدّا تصوير فيديو، و انا عندي مقطع فيديو بس مااعرفت كيف بدي نزلو.. و السؤال هو انو الأغاني بدبي عربي؟
عكل حال هادا رابط الفيديو عالفيس بوك ان شاء الله تفتح معكون وتعجبكون
https://www.facebook.com/video/editvideo.php?v=1091397777312#/video/video.php?v=1091397777312&ref=mf
وكمان هادا رابط فيديو عشلالات نياغارا
https://www.facebook.com/video/editvideo.php?v=1091397777312#/video/video.php?v=1091883909465&ref=mf

انا صورتا وكل جمعة منروح منتفرج بس بالفيديو مابتنقل نفس الاحساس
بتحس حالك صغير وضعيف ولطيف وقلبك عم يرقص ومصدوم وباخر العرض ورغم صغر الفترة الزمنية بينزل عليك رزاز المي يمكن لحتى تفيق بس بجد شعور حلو كانك بحلم وانت صاحي

تكرم عين نورا بعملا كرت زيارة بس عحسابا التكيت

شفتي كرم حاتمي انا ولافي احسن من هيك طيب حدا عزمك على حسابك غيري

انا رحت الكويت وعشت فيها فتره كويسه صدقوني مهما كانت العماره وفنونها متطوره في بلد ما ما بيعني انو احلى من الوطن
رغم كل العماره المتفوقه بالكويت كنت اشتاق لشوارع مدينتي حمص فاكتشفت العلاقه بين الانسان والمكان هالعلاقه ال بتشبه العلاقه بين الناس مع بعضهن
وما مننسا ابيات الشعر الي قالتها ميسون زوجه معاويه
لبيت تخفق الارواح فيه احب الي من قصر منيف
ومو بس ميسون حكت عن العلاقه بين الانسان وبيته اي وطنه في المعنى الكبير
فالملكه اليزبيت جاوبت احد اتبعها وقالت الو بيتك هو قصرك
يعني الانسان ما بيرتاح الافي بيتو مهما كان هالبيت صغير ومتواضع
وشكرا

كنا عم نحكي على نافورة الله الوكيل مو حابة اسكن فيا
عاشقق الشمميس شيلك من المزح انا نافورة سلمية الا معزة خاصة عندي لانو في عندا نكهة خاصة هيك قمة التواضع مع كل شي حولا من اكسسوارات نسيت بياعين الفول يلي عم عيطو وبياعت الخبز هي يلي صحتا منيحة
بتذكرو اول مانعملت كانو العالم يقعدو حدا يشربو متة بشرفي كنت احسدن

دكتور ماهر انا ع هوا معلوماتي انو حكومة دبي جابت نفس المهندسين اللي صممو النوافير الراقصة بلاس فيغاس وصممو نافورة مول دبي
كل حال المي بترقص ع أغاني اجنبية وخليجية وطبعا ما بيخلى الامر من رقصة هندية تكريما للهنود اللي انحرقو تحت الشمس وهنن عم ينفذوا هيك مشروع

من يوم أن رحلت دون ماء
نخاف يا ربيع
نخاف إن نسيت أن نضيع

بس أحلى شي بياعين الفول اللي عند النافورة! حتى صار جدول بياعين الفول المناوبين أهم من جدول الصيدليات المناوبة!
و بياعية الخببببزززز! فريدة!!!
اهلين وسهلين أونلي مي!